أهم 5 نصائح اذا كنت طالب سنة أولى في الجامعة

 طالب جديد في الجامعة : 

إذا كنت طالب/ة توجيهي وخلصت وحصلت على معدل برضيك إن شاء الله ،وحابب تدخل الجامعة ولكن عندك عدة استفسارات براسك وأشياء مجهولة لأنك رايح على بيئة جديدة وممكن تكون ببلد غير عن بلدك، ومش لاقي حدا يجاوبك عليهن ، فإحنا كتبنالك أفضل خمس نصائح لطالب جديد على الجامعة .

النصيحة الأولى دراسياً : 

 أول إشي لازم نحكي عن الدراسة لأنو احنا رايحين على الجامعة لهدف واحد وهو التعلم وكسب العلم والمعرفة بمجال معين انت اخترته واخترت إنك تكمل مسيرتك التعليمية فيه ، خلينا نتفق على شغلة انو المدرسة تختلف كلياََ عن الجامعة ،الجامعة بتكون كل المسؤولية عليك من جميع الجوانب ،بالمدرسة بتدرس عدة مواد متنوعة ، بالجامعة بتدرس عدة مواد كلها بتتمحور حول مجال معين وواحد ، بالمدرسة تقريبا بتدرس الي موجود بالكتاب أو الي بعطيك اياه الأستاذ/ة،ولكن بالجامعة غير الدكتور/ة بمسك الملف الي معاه والي لازم تدرس منه ( وهاد الملف بختلف من دكتور/ة لآخر لنفس المادة ) بعطيك فقط رؤوس أقلام عن الموضوع إلي بحكو عنو وانت عليك إنك تكمل وتفهم وتبحث عن هاد الموضوع عشان تفهمه بزيادة وتتعمق فيه بالنهاية هاد تخصصك إلي رح يضل مرتبط فيك طول حياتك من بعد الجامعة فحلو إنك تكون عارف كل إشي فيه ومتعمق وفاهم ، المحاضرة مدتها ساعة او ساعتين او ممكن تمد لثلاث ساعات مش زي الحصة أربعين دقيقة ،فلازم تهيأ نفسك للكم الهائل من المعلومات إلي رح توخذها ، ومن هاد المنطلق بتيجي نصيحة إنو ما تراكموا ع حالكم الدراسة ، إدرسوا أول بأول يوم بيومه (لا تؤجل عمل اليوم للغد ) ، وكمان رح أحكي عن نقطة مهمة وهي اللغة الإنجليزية اذا كان تخصصك باللغة الانجليزية وانت كنت ضعيف فممكن توقع بورطة وهي إنو لما تيجي تقدم إمتحان أكيد رح يكون بالإنجليزي وممكن معنى كلمة وحدة يغيّر معنى السؤال كله وتجاوبه غلط مع ذلك تكون انت دارس المادة منيح وفاهم المادة منيح وعارف الجواب الصح بس المعنى غيّر تفكيرك ونصيحتي إلك هون إنو أي كلمة علمية او جديدة عليكم اكتبها عندك على دفتر جانبي واحفظ ودون ( وهاي أحسن طريقة إنك تحسن فيها لغتك الإنجليزية من ناحية تخصصك وتقدر تكمل فيه بكل سلاسة ) أما إذا كنت بدك تطورها عشان تستخدمها بيومك وتواصلك مع الآخرين فكورسات الأون لاين ملانة مدفوعة وغير مدفوعة ، والآن رح نحكي عن المعدل ،إدرسوا كثير كثير منيح لأنو معدل سنة أولى هو إلي بحكم معدلك طول فترتك الدراسية إلي بعدها وما تنشغلو كثير ،خلوا هدفكم الوحيد هو الدراسة الفعالة (رح أرفق لكم فيديو لأنواع الدراسة الفعالة ) وكسب علم جديد ، وحطوا أمل أهلكم فيكم قدام عيونكم دائماً ،وربنا ما بضيع تعب حدا فيكم ابدأ ،قال تعالى (فإن الله لا يضيع أجر المحسنين) {هود:115}.

النصيحة الثانية اجتماعياً : 

 انت رح تدخل بيئة جديدة ناس جديدة ،رح تحس حالك في عالم آخر من داخل الجامعة وكذا بس خلي علاقتك مع الكل سطحية أول كم شهر وما تتعمق كثير ولا تكون انطوائي ع نفسك ،خليك اجتماعي مع الكل ،ما توثق بحدا ولا بواحد بالمية ، ما تكره حدا وما تحب حدا ( المرحلة الأولى من الجامعة عم نحكي )، بعدها ببلش يبين معك مين الصاحب إلي ع قد حاله وبتحس لو رافقته ما رح يذايقك ولا بأي شكل ،الي بتأمنله وبتوثق فيه ،وحاول تتقرب من الناس الشاطريين دراسياً لأنو الشاطر بشجعك ع الدراسة والاستمرار وبعرف متى وقت الجد جد ووقت المزح مزح ، ثاني موضوع هو موضوع الاختلاط في الجامعة ،

نصيحة للشب حاول قدر الامكان انو صحبتك ما تكون من البنات و العكس صحيح للبنت ما تختلطي بالشباب و ركزي صحبتك مع البنات.

و في حالة انك كنت/ي في تيم مختلط فحاول/ي قدر الإمكان تكون المواضيع الي تنفتح حول الدراسة فقط و عدم التطرق لخارجها .

وهاد الحكي مش من عندي هاي تعاليم ديننا في الأماكن المختلطة ، عشان نتجنب أي مشاكل غيرنا وقع فيها ،والواحد بكفيه الذنوب الي بعملها لسا بده يزيدهن بدخلته للجامعة ؟؟!

النصيحة الثالثة ما تكون أناني : 

وهاد بندرج تحت الدراسة ، إنو اذا انت كنت فاهم مادة معينة ومتمكن منها ما تبخل على حالك أو على زملائك بإنك تشرحلهم إياه أو تفهمهم ، وجدد النية انو كله لوجه الله تعالى ولكسب رضاه وما تنسى إنو ربنا ما بنسى تعب حدا ،لأنو رح يجي يوم تكون انتا مش فاهم شغلة وتلاقي ناس تفهمك إياها . 

النصيحة الرابعة استغلال الوقت في فراغ الجامعة : 

بدوام الجامعة رح تشوف انو الوقت بمشي بسرعة بس لو تركز شوي رح تشوف انو بتقدر انت بإيدك تدير هاد الوقت وتستغله ، مثلا المحاضرات أحيانا ما بكونو ورا بعض في بينهم فراغ ساعة ساعتين فبنقدر نستغل هدول الساعتين باشياء كثير مفيدة منها انو أدرس إلي أخذته بالمحاضرة الي فاتت بمكان هادئ مثل المكتبة ..الخ، بدل ما أضيعهم وأحكي أنا كنت بالدوام أصلاََ  ، الوقت الي بنقضيه بالسيارة واحنا رايحين أو واحنا مروحين نستغله بإنو نراجع موادنا ،نسمع بودكاست ،نقرأ كتاب ،نخطط ليومنا ،نتفائل بالخير وطاقة ايجابية ،لانو أول نص ساعة من خروجك من البيت هو الي بحدد يومك كله كيف يكون ، فتخيل يومك كيف بكون مليء بالانجازات ولحظات السعادة والفرح والامتنان .

النصحية الخامسة صحة أجسامنا : 

بنعرف انو احنا بنمرق بعصر السرعة ،وساعات بتمرق من يومنا واحنا مش حاسين فيها وبالتالي بسبب الانشغال والدراسة والبيئة الجديدة والتأقلم معها والتفكير فيها ،فكل هاد بأدينا انو ما نفكر بشو نوكل أو بالأحرى شو جودة ونوع الأكل الي بندخله لأجسامنا المهم اشي يشبعنا ،وهذا غلط فادح لازم نعرف انو احنا بفترة نمو ونشاط أولاََ ،ثانياََ انو احنا لازم نوكل أشياء صحية وغنية بالفيتامينات لأنو احنا بحاجة لإلها خلال الدراسة والتركيز ، الفطور الصحي وهي أهم وجبة ،وجود الكافيين بيومك مهم بس ما نكثر (كاسة شاي ،كاسة قهوة باليوم منيح )، ثالثاً رسولنا الكريم قال( لبدنك عليك حقا)رواه البخاري. وبالتالي لازم نهتم بصحتنا.

والنشاط هون بيجي انو نمشي يوميا نص ساعة على الاقل أو نعمل (walk at home ) رح أقوم برفق إحدى الفيديوهات ،أو أي نشاط بدني سواء بالنادي او من البيت أو برا البيت ،والنشاط بزيد من تركيزنا وبضيع الطاقة السلبية إلي بداخلنا ،وانتبه إنو هاي النشاطات ما تأثر على دراستك .

موفقين وبتمنى إلكم لحظات جميلة بحياتكم الجامعية .